فيليه بالفطر المأكول

السلام عليكم أنيقاتي اليومة جبتم ليك شهيوة عصرية حيت حنا المغربيات عزيز علينا التغيير في وصفاتنا وكيعجبنا نجربو الجديد في الطبخ خاصة إلى كانو وصفات من دول قريبة علينا بحال إيطاليا مثلا اللي معروفة في العالم بأطباق شهية من غير السباكيتي والبيتزا وهادي وحدة من أشهر أطباقها

أنا هادو هما المقادير اللي استعملت
فيليه ديال العجل فيه750غرام
450غرام ديال الشومبنيون أو الفطر
عريش أزير
وريقات ديال السالمية
أعشاب منسمة جافة
شوية ملح وإبزار
مكعب البنة
معلقة زبدة
معلقة كبيرة زيت الزيتون
معلقة صغيرة طحين فورص
نص لتر ماءساخن

كنتكو عريشات أزير ووريقات السالمية في الشبيكة اللي دايرة بالفيلي ونرشوه بشوية ملح وإبزار

نسخنو الزيت والزبدة ونقليو الفيلي من كل الجهات

نرشو الأعشاب المنسمة إلا ماكانتش متوفرة تقدرو تتسغناو عليها غير هي كتركز مداق أزير والسالمية

ندوبو ضامة البنة في الما سخون

نضيفوه على اللحم ونغطيو عليه شي ساعة

مرة مرة نقلبوه ونتكوه بالموس حتى مايبقاش يخرج الدم ويخرج الما بيض ديك السعات نعرفو راه اللحم طاب


منين كيطيب اللحم كنضيفو ليه الشمبينيون

نخليوهم شي 10 دقايق ونحيدو اللحم نخليو يبرد وناخدوشوية ديال المرقة في شي زلافة ولا كاس ولا طاس دالقهوة كيفما درت أنا نزيدو عليها معلقة صغيرة ديال الفورص ونخلطو مزيان حتى مايبقاوش كويرات ديال الطحين باينين

نضيفو خليط المريقة والطحين للصوص ديال الشومبنيون وندوروها بحال الحريرة

نخلي الصوص تغلا ونطفيو عليها

ناخدو اللحم نحيدو ليه الشبكة والأعشاب المنسمة

نقطعوه

نديرو قطع الفيلي في طبق التقديم مع صوص الشومبينيون هالطبق ديالنا جاهز بالصحة والراحة

نتمنى تعجبكم الوصفة وتجربوها راه كتجي لديدة وبزاف على فكرة أنا قدمتوفي أطباق فردية كيفما ممكن نقدموه في طبسيل كبير بنفس الطريقة في أمان الله